‘കോഴിക്കോട് ഫെസ്റ്റ് 2024’ മെയ് 3 വെള്ളിയാഴ്ച്ച
കുവൈറ്റ് : കോഴിക്കോട് ജില്ലാ അസോസിയേഷൻ കുവൈറ്റിന്റെ പതിനാലാം വാർഷികാഘോഷം ‘കോഴിക്കോട് ഫെസ്റ്റ് 2024’ മെയ് 3 വെള്ളിയാഴ്ച്ച വൈകുന്നേരം 5 മണി മുതൽ അബ്ബാസിയ സെൻട്രൽ സ്കൂൾ ഓപ്പൺ ഓഡിറ്റോറിയത്തിൽ പ്രത്യേകം തയ്യാറാക്കിയ മാമുക്കോയ നഗറിൽ നടക്കുമെന്ന് സംഘാടകർ വാർത്താ സമ്മേളനത്തിൽ അറിയിച്ചു.
ചരിത്രമുറങ്ങുന്ന കോഴിക്കോടിന്റെ മണ്ണിൽ നിന്ന് പ്രവാസികളായി കുവൈത്തിൽ എത്തിചേർന്നവർ രൂപീകരിച്ച സ്നേഹത്തിന്റെയും സൗഹൃദത്തിന്റെയും കാരുണ്യത്തിന്റെയും കൂട്ടായ്മയാണ് കോഴിക്കോട് ജില്ലാ അസോസിയേഷനെന്നും . ജാതി മത രാഷ്ട്രീയ ചിന്തകൾക്ക് അപ്പുറം കോഴിക്കോട് ജില്ലയുടെ സാംസ്കാരിക മുഖമായി അസോസിയേഷൻ കഴിഞ്ഞ പതിനാല് വർഷമായി കുവൈറ്റിൽ പ്രവർത്തിച്ചു വരുന്നതായും, പ്രയാസമനുഭവിക്കുന്ന നിർദ്ധനരും, നിരാലംബരുമായവർക്ക് കൈത്താങ്ങാവുക എന്ന ലക്ഷ്യത്തോടെ പ്രവർത്തിക്കുന്ന കാരുണ്യം പദ്ധതി, അസോസിയേഷൻ രൂപീകൃതമായതു മുതൽ നാളിതുവരെ ക്യാൻസർ, വ്യക്കരോഗങ്ങൾ, ഹൃദയ സംബന്ധമായ അസുഖങ്ങൾ തുടങ്ങി ഗുരുതരമായ രോഗങ്ങൾ കൊണ്ട് കഷ്ടപ്പെടുന്നവരെ സഹായിക്കൽ തുടങ്ങിയ പ്രവർത്തനങ്ങൾ നടത്തിവരുന്നതായും, ഇതിനോടൊപ്പം തന്നെ അസോസിയേഷൻ അംഗങ്ങളുടെ ചികിത്സാ സഹായവും കുടുംബക്ഷേമ പദ്ധതി പ്രകാരം മരണപെടുന്ന അംഗങ്ങളുടെ കുടുംബാംഗങ്ങൾക്കുള്ള സാമ്പത്തിക സഹായവും കാലതാമസം നേരിടാതെ വിതരണം ചെയ്തു വരുന്നതായും സംഘാടകർ അറിയിച്ചു. കൂടാതെ കോഴിക്കോടിന്റെ മതേതര പാരമ്പര്യം ഉയർത്തിപ്പിടിച്ചു കൊണ്ട് വിവിധ ആഘോഷങ്ങളും അസോസിയേഷൻ സംഘടിപ്പിക്കുന്നു. ഇഫ്ത്താർ സംഗമം, ഓണം ഈദ് ആഘോഷം, ക്രിസ്തുമസ് പുതുവത്സരാഘോഷം തുടങ്ങിയ പരിപാടികൾ ആണ് ഇത്തരത്തിൽ സംഘടിപ്പിക്കുന്നത് . അസോസിയേഷന്റെ കീഴിൽ മഹിളകൾക്കായി മഹിളാവേദിയും കുട്ടികൾക്കായി ബാലവേദിയും പ്രവർത്തിച്ചു വരുന്നു.
ഇത്തവണ ആഘോഷ പരിപാടികളിൽ നാട്ടിൽ നിന്ന് എട്ടോളം കലാകാരന്മാർ ആണ് കുവൈറ്റിൽ എത്തുന്നത്. ശ്യാം മില്ലേനിയം, ഫാസില ബാനു, സ്നേഹ അശോക്, ഷാനിഫ്, മുസവ്വിർ തുടങ്ങിയ ഗായകരും നബീൽ, മുബഷിർ, ഹകീം അടങ്ങുന്ന ഓർക്കസ്ട്രാ ടീമും ആണ് കോഴിക്കോട് ഫെസ്റ്റ് 2024-ന്റെ സംഗീത വിരുന്ന് നയിക്കുന്നത്. കൂടാതെ അസോസിയേഷൻ മഹിളാവേദി, ബാലവേദി ടീമുകളുടെ നൃത്താവിഷ്കാരവും നടക്കും. നജീബ് പി.വി (പ്രസിഡണ്ട്), ജാവേദ് ബിൻ ഹമീദ് (ജനറൽ സെക്രട്ടറി), സന്തോഷ്‌ കുമാർ (ട്രഷറർ), ഹനീഫ്. സി (ജനറൽ കൺവീനർ കോഴിക്കോട് ഫെസ്റ്റ് 2024), ജുനൈസ്. കെ (ഓപറേഷൻ മാനേജർ മെഡക്സ് മെഡിക്കൽ കെയർ), മുഹമ്മദ്‌ അലി (ഓപറേഷൻ മാനേജർ മംഗോ ഹൈപ്പർ), ഹസീന അഷ്‌റഫ് (പ്രസിഡണ്ട് മഹിളാവേദി), രേഖ (ജനറൽ സെക്രട്ടറി മഹിളാവേദി) എന്നിവർ വാർത്താ സമ്മേളനത്തിൽ പങ്കെടുത്തു
