നാട്ടിലൊരു സിനിമ;സമ്മാന വിതരണം നടത്തി
തൃശ്ശൂര്‍: എക്‌സൈസ് വിമുക്തി മിഷന്റെ നേതൃത്വത്തില്‍ ‘നാട്ടിലൊരു സിനിമ’ എന്ന പേരില്‍ സംഘടിപ്പിച്ച ഷോര്‍ട്ട് ഫിലിം മത്സരത്തിന്റെ സമ്മാനദാനം നടന്നു. തൃശ്ശൂര്‍ ചേതന കോളേജ് ഓഫ് മീഡിയ ആന്‍ഡ് പെര്‍ഫോമിംഗ് ആര്‍ട്‌സില്‍ നടന്ന ചടങ്ങില്‍ ചേതന കോളേജ് ഡയറക്ടര്‍ ഫാ. ജിജോ തീതായ് അധ്യക്ഷനായി. ഡെപ്യൂട്ടി എക്‌സൈസ് കമ്മീഷണര്‍ സി. സുനു സമ്മാന വിതരണം നടത്തി. സംസ്ഥാനതലത്തില്‍ ഹൈസ്‌കൂള്‍ വിഭാഗത്തില്‍ ഒന്നാം സ്ഥാനം ലഭിച്ച ചാലക്കുടി സേക്രഡ് ഹാര്‍ട്ട് കോണ്‍വെന്റ് ഗേള്‍സ് ഹയര്‍ സെക്കണ്ടറി സ്‌കൂള്‍, എല്‍.പി/ യു.പി വിഭാഗത്തില്‍ ഒന്നാം സ്ഥാനം ലഭിച്ച മുരിയാട് എ.യു.പി സ്‌കൂള്‍, ജില്ലാതലത്തില്‍ കോളേജ് വിഭാഗത്തില്‍ ഒന്നാം സ്ഥാനം ലഭിച്ച തൃശ്ശൂര്‍ ചേതന കോളേജ് ഓഫ് മീഡിയ ആന്‍ഡ് പെര്‍ഫോമിംഗ് ആര്‍ട്‌സ് എന്നിവര്‍ സമ്മാനങ്ങള്‍ ഏറ്റുവാങ്ങി. അസി. എക്‌സൈസ് കമ്മീഷണറും വിമുക്തി മിഷന്‍ ജില്ലാ മാനേജറുമായ പി.കെ. സതീഷ് പദ്ധതി വിശദീകരണം നടത്തി. ചേതന കോളേജ് പ്രിന്‍സിപ്പാള്‍ അരുണ്‍ ജോണ്‍ മാണി, വൈസ് പ്രിന്‍സിപ്പാള്‍ ഇ.വി രന്യ, ജില്ലാ വിമുക്തി കോഓര്‍ഡിനേറ്റര്‍ ഷഫീഖ് കെ.വൈ എന്നിവര്‍ സംസാരിച്ചു.
