കഴിമ്പ്രം വാഴപ്പുള്ളി ക്ഷേത്രത്തിൽ ചെണ്ടുമല്ലി കൃഷിയുടെ വിളവെടുപ്പ് ആരംഭിച്ചു

വലപ്പാട്‌ : കഴിമ്പ്രം വാഴപ്പുള്ളി ക്ഷേത്രത്തിൽ ഓണകാലത്തേക്കായി നടത്തിയ ചെണ്ടുമല്ലി കൃഷിയുടെ വിളവെടുപ്പ് ആരംഭിച്ചു. ക്ഷേത്രത്തിനു വേണ്ടി സമീപകാലത്ത് വാങ്ങിയ സ്ഥലത്ത് 400 -ഓളം ചെണ്ടുമല്ലി തൈകൾ ആണ് വലപ്പാട് കൃഷിഭവന്റെ സഹകരണത്തോടെ നട്ടുവളർത്തിയിരുന്നത്. വിളവെടുപ്പിന്റെ ഉദ്ഘാടനം വലപ്പാട് കൃഷിഭവൻ ഓഫീസർ ലക്ഷ്മി മോഹൻ നിർവഹിച്ചു. ക്ഷേത്രം ഭാരവാഹികളായ വി യു ഉണ്ണികൃഷ്ണൻ, വി ആർ രാധാകൃഷ്ണൻ, വി കെ ഹരിദാസൻ, വി സി ഷാജി എന്നിവർ നേതൃത്വം നൽകി. വളരെ മാതൃകാപരമായ രീതിയിൽ ചെണ്ടുമല്ലി കൃഷി ചെയ്ത ക്ഷേത്ര ഭരണസമിതിയെ കൃഷി ഓഫീസർ അഭിനന്ദിച്ചു. ഇതുപോലെ പച്ചക്കറി കൃഷി ചെയ്യാനുള്ള പദ്ധതികളും ആവിഷ്കരിച്ച് നടപ്പിലാക്കാവുന്നതാണെന്ന് കൃഷി ഓഫീസർ ലക്ഷ്മി മോഹൻ അഭിപ്രായപ്പെട്ടു.