നാനൂറിൽ പരം വിഭവങ്ങളുമായി നാട്ടിക എസ്.എൻ. കോളേജ് ഭക്ഷ്യമേള

നാട്ടിക : ദേശീയ ഭക്ഷ്യ ദിനാചരണത്തോടനുബന്ധിച്ച്, നാട്ടിക ശ്രീനാരായണ കോളജിലെ ബോട്ടണി വിഭാഗവും ഫുഡ് ടെക്നോളജി വിഭാഗവും സംയുക്തമായി വിവിധ വിഭവങ്ങളോട്കൂടിയ ഭക്ഷ്യമേള സംഘടിപ്പിച്ചു. പൗരാണികവും അപൂർവവുമായ ഭക്ഷണങ്ങളെ അടുത്തറിയുവാനും രുചിച്ചു നോക്കുവാനും പുതു തലമുറക്ക്‌ അവസരമൊരുക്കാൻ ഉദ്ദേശിച്ചിട്ടുള്ളതായിരുന്നു ഭക്ഷ്യമേള.
മേളയിൽ 400-ലേറെ വിവിധയിനം ഭക്ഷണങ്ങൾ പ്രദർശിപ്പിക്കുകയും വില്പന നടത്തുകയും ചെയ്തു. 50-ൽപ്പരം വ്യത്യസ്തയിനം അപ്പങ്ങൾ, വിവിധയിനം അടകൾ, ഉണ്ടകൾ, പുട്ടുകൾ, ദോശകൾ, കറികൾ, മെഴുക്കുപുരട്ടികൾ, എണ്ണപ്പലഹാരങ്ങൾ, ചമ്മന്തികൾ, അച്ചാറുകൾ, പായസങ്ങൾ, കേക്കുകൾ, പുഡിങ്ങുകൾ, ശീതളപാനീയങ്ങൾ എന്നിവയൊക്കെ ഭക്ഷ്യ മേളയിൽ ഉൾപ്പെടുത്തിയിരുന്നു.
പ്രദർശിപ്പിച്ച പ്രധാന വിഭവങ്ങൾ
അപ്പങ്ങൾ: ബീറ്റ്റൂട്ട് അപ്പം, റാഗിയപ്പം, ഊത്തപ്പം, കിണ്ണത്തപ്പം, വെളുത്തുള്ളി അപ്പം, നൂലപ്പം, വട്ടയപ്പം, കള്ളപ്പം.
അടകൾ: ചക്ക അട, ഗോതമ്പട, റാഗി അട, ശർക്കര അട, തേങ്ങ അട.
ഉണ്ടകൾ: നെയ്യുണ്ട, അവിലുണ്ട, എള്ളുണ്ട, മോദകം, സേമിയുണ്ട.
പുട്ടുകൾ: തട്ട് ചിരട്ട പുട്ട്, ബീറ്റ്റൂട്ട് മണിപ്പുട്ട്, മസാലപ്പുട്ട്, ചെറുചോളപ്പുട്ട്.
ദോശകൾ: തക്കാളി ദോശ, ബീറ്റ്റൂട്ട് ദോശ, റാഗി ദോശ, മസാല ദോശ, ചെറുപയർ ദോശ.
കറികൾ: ബീറ്റ്റൂട്ട് പച്ചടി, ചേമ്പ് താള്, തഴുതാമ തോരൻ, മുരിങ്ങയില തോരൻ, ബ്രൊക്കോളി തോരൻ.
മെഴുക്കുപുരട്ടികൾ: കൂർക്ക, പയർ, മുതിര.
എണ്ണപ്പലഹാരങ്ങൾ: പിടി, നെയ്പ്പത്തിരി, പഴംപൊരി, ചട്ടിപ്പത്തിരി.
പ്രധാന പരിപാടികളും സമ്മാനങ്ങൾ
പ്രിൻസിപ്പൽ ഡോ. പി.എസ്. ജയ ചടങ്ങ് ഉദ്ഘാടനം ചെയ്തു. ശ്രീനാരായണ കോളേജ് ഓഫ് അഡ്വാൻസ്ഡ് സ്റ്റഡീസ് പ്രിൻസിപ്പൽ ഡോ. ടി.എൻ. സരസു, RDC കൺവീനർ ശ്രീ പി.കെ. പ്രസന്നൻ, RDC പ്രസിഡന്റ് ഉണ്ണികൃഷ്ണൻ തഷ്‌ണാത് തുടങ്ങിയവർ ചടങ്ങിൽ വിശിഷ്ടാതിഥികളായി.
മേളയുടെ മത്സരത്തിൽ സുവോളജി ഡിപ്പാർട്മെന്റും ബോട്ടണി ഡിപ്പാർട്മെന്റും ഒന്നാം സ്ഥാനം നേടി, മാതമറ്റിക്സ് വിഭാഗം രണ്ടാം സ്ഥാനം, സ്റ്റാറ്റിസ്റ്റിക്സ് വിഭാഗം മൂന്നാം സ്ഥാനവും കരസ്ഥമാക്കി. വിജയികൾക്ക് ഡോ. കെ. എൻ. രമേഷ് ഏർപ്പെടുത്തിയ ക്യാഷ് പ്രൈസുകൾ വിതരണം ചെയ്തു.
പരിപാടിയിൽ ബോട്ടണി വിഭാഗം മേധാവി ഡോ. അനിത, ബി. വോക് ഡിപ്പാർട്ട്മെന്റിലെ അദ്ധ്യാപകർ കൃഷ്ണ ഘോഷ്, അനുപമ കെ. എസ്., എവിലിൻ സജിത്ത് എന്നിവർ പങ്കെടുത്തു. സ്റ്റുഡന്റ് വോളണ്ടിയേഴ്സ് മുർഷിദ് സി. കെ., അസർ യാസിർ എന്നിവർ പരിപാടിയുടെ ഭാഗമായി പ്രവർത്തിച്ചു.