പ്രമുഖ ചരിത്രകാരനും ഗ്രന്ഥകർത്താവുമായ വേലായുധൻ പണിക്കശ്ശേരി അന്തരിച്ചു

തൃശ്ശൂർ: പ്രമുഖ ചരിത്രകാരനും ഗ്രന്ഥകർത്താവുമായ വേലായുധൻ പണിക്കശ്ശേരി (90) അന്തരിച്ചു. വാർദ്ധക്യ സഹജമായ അസുഖത്തെ തുടർന്ന് കഴിഞ്ഞ മൂന്നു ദിവസമായി ചാവക്കാട് സ്വകാര്യ ആശുപത്രിയിൽ ചികിത്സയിലായിരുന്ന അദ്ദേഹം വെള്ളിയാഴ്ച പുലർച്ചെ 5:50-ന് ആണ് അന്തരിച്ചത്.
1934 മാർച്ച് 30-ന് ജനിച്ച വേലായുധൻ പണിക്കശ്ശേരി 1956-ൽ മലബാർ ലോക്കൽ ലൈബ്രറി അതോറിറ്റിയുടെ ഏങ്ങണ്ടിയൂർ ബ്രാഞ്ച് ലൈബ്രറിയിൽ ലൈബ്രേറിയനായി ജോലിയിൽ പ്രവേശിച്ചു. 1991-ൽ അവിടെ നിന്ന് വിരമിച്ചു. ശേഷം ചരിത്ര ഗവേഷണത്തിലേക്ക് തിരിഞ്ഞ വേലായുധൻ പണിക്കശ്ശേരി 65-ൽപ്പരം ഗ്രന്ഥങ്ങൾ രചിച്ചു. അദ്ദേഹത്തിന്റെ രചനകൾ ചരിത്രം, ജീവചരിത്രം, ഫോക്‌ലോർ, ബാലസാഹിത്യം തുടങ്ങിയ മേഖലകളിൽ വ്യാപിച്ചിരുന്നു.
ഏങ്ങണ്ടിയൂർ സരസ്വതി വിദ്യാനികേതൻ സെൻട്രൽ സ്കൂൾ മാനേജരും ദീനദയാൽ എജ്യുക്കേഷണൽ & കൾച്ചറൽ ചാരിറ്റബിൾ ട്രസ്റ്റിന്റെ ചെയർമാനും ആയിരുന്ന അദ്ദേഹം വിദ്യാഭ്യാസ മേഖലയിലും സജീവമായിരുന്നു.
കേന്ദ്ര സാംസ്‌കാരിക വകുപ്പിന്റെ ഫെല്ലോഷിപ്പ്, കേരള സാഹിത്യ അക്കാദമിയുടെ സമഗ്ര സംഭാവനയ്ക്കുള്ള പുരസ്‌കാരം, വി.എസ്. കേരളീയൻ അവാർഡ്, പി.എ. സെയ്ദ് മുഹമ്മദ് സ്മാരക അവാർഡ്, എൻ.കെ. ഫൗണ്ടേഷൻ അവാർഡ് എന്നിവ ഉൾപ്പെടെ നിരവധി ബഹുമതികൾ അദ്ദേഹത്തെ തേടിയെത്തി.
ഭാര്യ ലീല ,മക്കൾ ചിന്ത , ഡോ .ഷാജി പണിക്കശ്ശേരി, വീണ മരുമക്കൾ രാധാറാം,മുരളി,ബിനുരാജ് സംസ്കാരം ശനിയാഴ്ച 11 മണിക്ക് സ്വവസതി(നളന്ദ) യിൽ വെച്ച് നടക്കും.