പ്രവാസി വെൽഫെയർ കുവൈത്ത് പത്താം വാർഷിക സമ്മേളനം ഫെബ്രുവരി 25-ന്; മറിമായം കലാകാരൻമാരുടെ സ്റ്റേജ് ഷോ മുഖ്യ ആകർഷണം

കുവൈറ്റ് : പ്രവാസി വെൽഫെയർ കുവൈത്തിന്റെ പത്താം വാർഷിക സമ്മേളനം ഫെബ്രുവരി 25 ഞായറാഴ്ച കുവൈത്ത് ദേശീയ അവധി ദിനത്തിൽ അബ്ബാസിയ ഇന്ത്യൻ സെൻട്രൽ സ്കൂളിൽ നടക്കുമെന്ന് സംഘാടകർ അറിയിച്ചു. ജനപ്രിയ ടെലിവിഷൻ പരമ്പരയായ മറിമായം കലാകാരൻമാരുടെ സ്റ്റേജ് ഷോ ആണ് കലാപരിപാടികളിലെ മുഖ്യ ആകർഷണം. കൂടാതെ വിവിധ കലാപരിപാടികളും അരങ്ങേറും. കുവൈത്ത് പ്രവാസി സമൂഹത്തിൽ സേവന പ്രവർത്തനങ്ങളുടെ മികവുമായാണ് പ്രവാസി വെൽഫെയർ കുവൈത്ത് പത്താം വർഷത്തിലേക്ക് പ്രവേശിക്കുന്നതെന്ന് പ്രസി‍ഡണ്ട് ലായിക് അഹമ്മദ് പറഞ്ഞു. ഏറ്റവും കൂടുതൽ രക്തദാന ക്യാമ്പുകള് സംഘടിപ്പിച്ച സഘടനക്കുള്ള കുവൈത്ത് ബ്ലഡ് ബാങ്കിന്റെ പ്രത്യേക അവാർഡ്, കോവി‍ഡ് കാല സേവനങ്ങൾക്കുള്ള മീഡിയ വൺ ചാനലിന്റെ Brave Heart അവാർഡ് എന്നിവ ലഭിച്ചത് തങ്ങളുടെ പ്രവർത്തനത്തിനുള്ള പ്രത്യക്ഷ അംഗീകാരം ആയിരുന്നെന്നും, മാധ്യമങ്ങൾ എന്നും പ്രവാസി വെൽഫെയർ കുവൈത്തിന്റെ പ്രവർത്തനങ്ങൾക്ക് വലിയ പിന്തുണ നൽകിയിട്ടുണ്ടെന്നും അദ്ധേഹം പറഞ്ഞു. പ്രവാസികൾക്കായി സംസ്ഥാന സർക്കാർ നൽകുന്ന സേവനങ്ങളെക്കുറിച്ച് പ്രവാസികളെ ബോധവൽക്കരിക്കുന്നതിനും പദ്ധതികളിൽ അം​ഗമാക്കുന്നതിനും വിപുലമായ സംവിധാനങ്ങൾ സംഘടന ഏർപ്പെടുത്തിയിട്ടുണ്ട്. പത്താം വാർഷിക സമ്മേളനത്തോട് അനുബന്ധിച്ചുള്ള പൊതു സമ്മേളനത്തിൽ റസ്റ്റോറന്റ്, കഫ്റ്റീരിയ മേഖലകളിൽ 35 വർഷം പൂർത്തിയാക്കിയ മലയാളി ജീവനക്കാരെ ആദരിക്കുമെന്നും സംഘാടകർ അറിയിച്ചു. മുൻവർഷങ്ങളിൽ മുതിർന്ന പൗരൻമാരെയും, നഴ്സുമാരെയും, ടാക്സി ​ഡ്രൈവർമാരെയും ആദരിച്ചിരുന്നു. ലായിക് അഹമ്മദ്, റഫീഖ് അഹമ്മദ്, സഫ് വാൻ, രാജേഷ് മാത്യു , റസീന മുഹ് യിദ്ദീൻ, റഫീഖ് ബാബു പൊൻമുണ്ടം , അനിയൻ കുഞ്ഞ് പാപ്പച്ചൻ , ഷൗക്കത്ത് വളാഞ്ചേരി , വിഷ്ണു നടേഷ് എന്നിവർ വാർത്താ സമ്മേളനത്തിൽ പങ്കെടുത്തു.