ജവഹര്‍ നവോദയ ആറാം ക്ലാസ് പ്രവേശനം; അപേക്ഷ ക്ഷണിച്ചു
തൃശ്ശൂര്‍ ജില്ലയിലെ മായന്നൂര്‍ ജവഹര്‍ നവോദയ വിദ്യാലയത്തിലേക്ക് 2025-26 അധ്യയന വര്‍ഷത്തെ ആറാം ക്ലാസ് പ്രവേശന പരീക്ഷയ്ക്ക് അപേക്ഷ ക്ഷണിച്ചു. www.navodaya.gov.in എന്ന വെബ്സൈറ്റിലൂടെ ഓണ്‍ലൈനായാണ് അപേക്ഷ സമര്‍പ്പിക്കേണ്ടത്. അവസാന തീയതി സെപ്റ്റംബര്‍ 16. പ്രവേശനം നേടാന്‍ ആഗ്രഹിക്കുന്ന വിദ്യാര്‍ത്ഥികള്‍ ജില്ലയിലെ ഏതെങ്കിലും സര്‍ക്കാര്‍/ സര്‍ക്കാര്‍ അംഗീകൃത വിദ്യാലയങ്ങളില്‍ അഞ്ചാം ക്ലാസില്‍ പഠിക്കുന്നവരും 2013 മെയ് ഒന്നിനും 2015 ജൂലൈ 31 നും ഇടയില്‍ ജനിച്ചവരും ജില്ലയില്‍ സ്ഥിര താമസക്കാരുമായിരിക്കണം. എസ്.സി/ എസ്.ടി/ ഒ.ബി.സി/ ഭിന്നശേഷി വിഭാഗങ്ങളില്‍പ്പെടുന്ന വിദ്യാര്‍ഥികള്‍ക്ക് സീറ്റുകളില്‍ സംവരണമുണ്ട്. മൂന്നിലൊന്ന് സീറ്റുകളില്‍ പെണ്‍കുട്ടികള്‍ക്കാണ് പ്രവേശനം. പ്രവേശന പരീക്ഷ 2025 ജനുവരി 18 ന് നടക്കും. കൂടുതല്‍ വിവരങ്ങള്‍ക്ക് ഫോണ്‍: 04884 286260, 9526977847, 9496968308, 8848365457.
