കളിച്ചു ജയിച്ച് കപ്പ് നേടി ഓസ്ട്രേലിയ; ഫൈനലിൽ ഇന്ത്യയെ തോൽപ്പിച്ചത് 6 വിക്കറ്റിന്
അഹമ്മദാബാദ്: 2023 ഏകദിന ലോകകപ്പ് കിരീടം ഓസ്‌ട്രേലിയക്ക്. ഇന്ത്യയുടെ അപരാജിത കുതിപ്പിന് വിരാമമിട്ട് തങ്ങളുടെ ആറാം ലോകകിരീടത്തില്‍ മുത്തമിട്ട്‌ ഓസീസ്. അഹമ്മദാബാദ് നരേന്ദ്ര മോദി സ്‌റ്റേഡിയത്തില്‍ നടന്ന ഫൈനലില്‍ ആറ് വിക്കറ്റിനാണ് ഓസ്‌ട്രേലിയയുടെ വിജയം. ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ നിശ്ചിത ഓവറില്‍ 240 റൺസിന് എല്ലാവരും പുറത്തായി. അര്‍ധസെഞ്ചുറി നേടിയ കെ എല്‍ രാഹുലും വിരാട് കോലിയും, 47 റണ്‍സെടുത്ത രോഹിത് ശര്‍മയുമാണ് ഇന്ത്യയ്ക്ക് ഭേദപ്പെട്ട സ്‌കോര്‍ സ്‌കോര്‍ സമ്മാനിച്ചത്. മറുപടി ബാറ്റിംഗില്‍ ഓസീസ് 42 പന്തുകൾ ബാക്കി നിൽക്കെ 4 വിക്കറ്റ് നഷ്ടത്തിൽ ലക്ഷ്യം കണ്ടു. 120 പന്തില്‍ 137 റണ്‍സെടുത്ത ട്രാവിസ് ഹെഡാണ് ഓസീസിന്റെ വിജയശില്പി. 58 റൺസെടുത്ത് പുറത്താകാതെ നിന്ന ലബുഷെയ്ന്‍ മികച്ച പിന്തുണ നൽകി.
