തോൽവിയിലും തിളങ്ങി മഹ്മുദുള്ള; ബംഗ്ലാദേശിനെ 149 റൺസിന് പരാജയപ്പെടുത്തി ദക്ഷിണാഫ്രിക്ക
മുംബൈ: ഏകദിന ലോകകപ്പിൽ ബംഗ്ലാദേശിനെ 149 റൺസിന് തകർത്ത് നാലാം ജയവുമായി ദക്ഷിണാഫ്രിക്ക. 383 റൺസിന്റെ കൂറ്റന്‍ വിജയലക്ഷ്യം പിന്തുടര്‍ന്ന ബംഗ്ലാദേശ് 233 റണ്‍സിന് ഓള്‍ഔട്ടായി. മധ്യനിരയില്‍ മഹ്മുദുള്ളയുടെ ഒറ്റയാള്‍ പോരാട്ടമാണ് ബംഗ്ലാദേശിനെ വൻ നാണക്കേടില്‍ നിന്ന് രക്ഷിച്ചത്. 111 പന്തില്‍ നിന്ന് നാല് സിക്‌സും 11 ഫോറുമടക്കം 111 റണ്‍സ് കൂട്ടിച്ചേർത്തായിരുന്നു മഹ്മുദുള്ളയുടെ മടക്കം.
ആദ്യം ബാറ്റ് ചെയ്ത് ദക്ഷിണാഫ്രിക്ക അഞ്ച് വിക്കറ്റ് നഷ്ടത്തില്‍ 382 റണ്‍സ് അടിച്ചു കൂട്ടി. ക്വിന്റണ്‍ ഡി കോക്ക് 140 പന്തില്‍ 15 ഫോറുകളും 7 സിക്സുകളുമടക്കം 174 റൺസെടുത്തു. 69 പന്തില്‍ 60 റണ്‍സെടുത്ത മര്‍ക്രാമും 49 പന്തില്‍ 90 റണ്‍സ് അടിച്ച് കൂട്ടിയ ഹെൻ‍റിച്ച് ക്ലാസനും മികച്ച പിന്തുണ നൽകി.
