കലാഭവൻ മണി സ്മാരക പുരസ്കാരം നാട്ടിക എസ് എൻ ട്രസ്റ്റ് എൻഎസ്എസ് കോഡിനേറ്റർ ശലഭ ജ്യോതിഷിന്

ജീവകാരുണ്യ പ്രവർത്തനങ്ങൾക്കുള്ള കലാഭവൻ മണി സ്മാരക പുരസ്കാരത്തിന് ശലഭ ജ്യോതിഷ് അർഹയായി. നാട്ടിക എസ് എൻ ട്രസ്റ്റ് ഹയർ സെക്കൻഡറി സ്കൂളിലെ എൻഎസ്എസ് കോഡിനേറ്റർ ആണ് ശലഭജ്യോതിഷ്. നിരവധി സാമൂഹിക, ജീവകാരുണ്യ പ്രവർത്തനങ്ങളിൽ സജീവ പങ്കാളിത്തം വഹിക്കുന്നതാണ് ശലഭയെ അവാർഡിന് അർഹയാക്കിയത്. ശലഭജ്യോതിഷ് ജോലി ചെയ്യുന്ന സ്കൂളിലെ ഒരു കുട്ടിയുടെ വീട് ജപ്തിയാണെന്ന് അറിയുകയും അതിൽ നിന്നും അവർക്ക് വിടുതൽ നേടുന്നതിന് ബിരിയാണി ചലഞ്ച് ഉൾപ്പെടെയുള്ള വൈവിധ്യങ്ങളായ പ്രവർത്തനങ്ങളിലൂടെ ഫണ്ട് സമാഹരിക്കുകയും ആ കുട്ടിയുടെ വീട് ജെപ്തിയിൽ നിന്ന് ഒഴിവാക്കുകയും ചെയ്തിരുന്നു. ശലഭ ജ്യോതിഷിന്റെ നേതൃത്വത്തിൽ എൻഎസ്എസിന്റെ ഇത്തരം പ്രവർത്തനങ്ങൾ കണ്ട് പ്രശസ്ത സിനിമാതാരം സുരേഷ് ഗോപി 4 ലക്ഷം രൂപ ആ കുട്ടിയുടെ വീടുപണിക്കായി അനുവദിച്ചിരുന്നു അതോടൊപ്പം എൻഎസ്എസിലെ വിദ്യാർത്ഥികൾ വിവിധ പ്രവർത്തനങ്ങളിലൂടെ വീട് പൂർത്തീകരിക്കാനുള്ള പണം കണ്ടെത്തുകയും ഫർണീച്ചറുകൾ ഉൾപ്പെടെയുള്ള പൂർണമായും വാസയോഗ്യമായ ഒരു വീട് ഇവർക്ക് പണിത് നൽകുകയും ചെയ്തു. ഭിന്നശേഷിയുള്ള വിദ്യാർത്ഥികൾക്കായും നിരവധി കർമ്മപരിപാടികൾ ആവിഷ്കരിച്ച് ശ്രദ്ധേയ ആയ എൻഎസ്എസ് കോഡിനേറ്റർ ശലഭ ജ്യോതിഷിന് കലാഭവൻ മണിയുടെ സ്മരണയ്ക്കായി രൂപീകരിച്ച കലാഭവൻ മണി മെമ്മോറിയൽ അവാർഡ് കമ്മിറ്റിയാണ് പുരസ്കാരം നൽകുന്നത് . നാളെ എറണാകുളം കലൂരിൽ വച്ച് നടക്കുന്ന ചടങ്ങിൽ പുരസ്കാരം വിതരണം ചെയ്യും.