ആവേശകരമായ മത്സരത്തിൽ ഓസ്‌ട്രേലിയക്ക് ന്യൂസീലന്‍ഡിനെതിരെ 5 റൺസിന്റെ വിജയം
ധരംശാല: ഏകദിന ലോകകപ്പിലെ ആവേശകരമായ മത്സരത്തില്‍ ന്യൂസീലന്‍ഡിനെതിരെ ഓസ്‌ട്രേലിയക്ക് അഞ്ചു റണ്‍സിന്റെ ജയം. 389 റൺസ് വിജയലക്ഷ്യം പിന്തുടർന്ന ന്യൂസീലന്‍ഡ് അഞ്ചു റണ്‍സകലെ വീഴുകയായിരുന്നു. അവസാന ഓവറില്‍ ജയത്തിലേക്ക് 19 റണ്‍സ് വേണ്ടിയിരുന്ന കിവീസിനായി ജെയിംസ് നീഷാം പൊരുതി നോക്കിയെങ്കിലും അഞ്ചാം പന്തില്‍ താരം റണ്ണൗട്ടായതോടെ അവരുടെ പ്രതീക്ഷ അവസാനിക്കുകയായിരുന്നു. ഓസീസിനായി ആദം സാംപ മൂന്നു വിക്കറ്റെടുത്തു. തുടര്‍ച്ചയായ നാലാം ജയത്തോടെ ഓസീസ് സെമി പ്രതീക്ഷകള്‍ സജീവമാക്കി.
89 പന്തില്‍ നിന്ന് അഞ്ച് സിക്സും ഒമ്പത് ഫോറുമടക്കം 116 റണ്‍സെടുത്ത രചിൻ രവീന്ദ്രയാണ് കിവീസിന്റെ ടോപ് സ്‌കോറര്‍. 39 പന്തില്‍ നിന്ന് മൂന്ന് വീതം സിക്സും ഫോറുമടക്കം ജെയിംസ് നീഷാം 58 റണ്‍സെടുത്തു.
