ദീപാവലി വിശ്വാസവും പ്രാർത്ഥനയും
ദീപങ്ങളുടെ ആഘോഷമാണ് ദീപാവലി. ദീപാവലി നാളിലെ വ്രതാനുഷ്ഠാനങ്ങള്‍ക്കും ഏറെ പ്രാധാന്യമുണ്ട്. ദീപാവലി ദിവസം വ്രതമനുഷ്ഠിച്ചാല്‍ കുടുംബത്തില്‍ ഐശ്വര്യം ഉണ്ടാകുമെന്നാണ് വിശ്വാസം. ഇക്കൊല്ലത്തെ ദീപാവലി നവംബർ 12 ഞായറാഴ്ചയാണ് വരുന്നത്. തുലാമാസത്തിലെ കൃഷ്ണപക്ഷ ചതുര്‍ദ്ദശി തിഥിയാണ് ദീപാവലിയായി ആഘോഷിക്കുന്നത്. ദീപാവലി ആഘോഷത്തിന് നിരവധി ഐതിഹ്യങ്ങൾ നിലവിലുണ്ട് ശ്രീകൃഷ്ണന്‍ നരകാസുരനെ നിഗ്രഹിച്ചതിന്റെ ആഘോഷമായി കാണുന്നവരുണ്ട് . ഉത്തര കേരളത്തിലും രാജ്യത്തിന്റെ മറ്റ് ഭാഗങ്ങളിലും ലക്ഷ്മിപൂജയ്ക്ക് വിശേഷപ്പെട്ട ദിവസമായും ദീപാവലി ആഘോഷിക്കുന്നു. പാലാഴി മഥനവേളയില്‍ ദേവി അവതരിച്ച ദിനമായും ഇത് സങ്കല്പിക്കപെടുന്നു. ദീപാവലിയുടെ തലേ ദിവസം ധന്വന്തരി പൂജയ്ക്ക് വളരെ വിശേഷമാണ്. രാവണ നിഗ്രഹ ശേഷം ശ്രീരാമന്‍ അയോദ്ധ്യയില്‍ തിരിച്ചെത്തിയ ദിവസമായും ഇത് ആചരിക്കുന്നു. പാലാഴി കടഞ്ഞപ്പോള്‍ അതില്‍നിന്നു മഹാലക്ഷ്മി ഉയര്‍ന്നു വന്ന ദിവസമാണു ദീപാവലി എന്നും പുരാണത്തില്‍ പരാമര്‍ശമുണ്ട്. ദീപാവലി ദിനത്തില്‍ ലക്ഷ്മീപൂജയ്ക്ക് പ്രാധാന്യം കല്‍പ്പിക്കപ്പെടാനുള്ള കാരണവും ഇതാണ്. ശത്രുസംഹാരഭാവത്തിലുള്ള ശ്രീകൃഷ്ണമൂര്‍ത്തിയുടെ മന്ത്രജപങ്ങളാലാണ് കേരളത്തില്‍ ദീപാവലി ദിവസം ചൊല്ലുന്നത്. തലേദിവസം അസ്തമയശേഷം മുതല്‍ വ്രതം എടുക്കുന്നവരും ഉണ്ട്. മത്സ്യമാംസാദികള്‍ പൂര്‍ണ്ണമായും ഉപേക്ഷിക്കുക, അരിയാഹാരം കഴിക്കാതിരിക്കുക, ലഘുഭക്ഷണം മാത്രം കഴിക്കുക . ആരോഗ്യമുള്ളവര്‍ ദീപാവലി ദിവസം പൂര്‍ണ്ണമായും ഉപവസിച്ച് വ്രതമെടുക്കുന്നതും നല്ലതെന്ന് ആചാര്യന്മാർ പറയുന്നു . ദീപാവലിയുടെ പിറ്റേന്ന് രാവിലെ ക്ഷേത്രദര്‍ശനം നടത്തി തീര്‍ത്ഥം സേവിച്ച് വ്രതം അവസാനിപ്പിക്കാം. മൂന്നു ദിവസവും വിഷ്ണുക്ഷേത്രദര്‍ശനമാണ് നല്ലതെന്നും ആചാര്യന്മാർ പറയുന്നു.
ബ്രാഹ്‌മമുഹൂര്‍ത്തത്തില്‍ എഴുന്നേറ്റ് എണ്ണതേച്ചു കുളിക്കണം. ജലത്തില്‍ ഗംഗാദേവിയുടെയും എണ്ണയില്‍ ലക്ഷ്മീദേവിയുടെയും ചൈതന്യമുണ്ട് എന്നാണ് ഹൈന്ദവ സങ്കല്‍പം. ദീപാവലി സ്നാനഫലമായി കാര്യതടസം, രോഗങ്ങള്‍, ദാമ്പത്യക്ലേശം, അകാലമൃത്യുഭയം, ശത്രുദോഷം തുടങ്ങിയവ അകന്ന് അഭീഷ്ടസിദ്ധിയും എല്ലാ ഐശ്വര്യങ്ങളും ലഭിക്കുമെന്നാണ് വിശ്വാസം. ദീപാവലി സ്‌നാനം കഴിഞ്ഞ് കോടി വസ്ത്രം ധരിച്ച് കഴിയുന്നത്ര തവണ ഓം നമോ നാരായണായ എന്ന അഷ്ടാക്ഷരമന്ത്രം ജപിക്കുന്നതും. ജപം കഴിഞ്ഞ് വിഷ്ണുക്ഷേത്രദര്‍ശനം നടത്തുന്നതും. ശിരസില്‍ തുളസി ധരിക്കുന്നതും . മദ്ധ്യാഹ്നത്തില്‍ ഓം വിഷ്ണവേ നമ: എന്ന മന്ത്രം 3008 പ്രാവശ്യം ജപിക്കുക . സന്ധ്യയ്ക്ക് ഓം നമോ ഭഗവതേ നാരായണായ മധുസൂദനായ നിത്യാത്മനേ ശ്രീം നമ: എന്ന മന്ത്രവും 3008 പ്രാവശ്യം ജപിക്കുക . സന്ധ്യയ്ക്ക് ഗൃഹത്തില്‍ പരമാവധി ദീപങ്ങള്‍ തെളിച്ച് പ്രാര്‍ത്ഥിക്കുക. വിഷ്ണുഭഗവാന് അഷ്ടോത്തരശതം, സഹസ്രനാമം, സ്തോത്രങ്ങള്‍ എന്നിവ യഥാവിധി ജപിക്കുക തുടങ്ങിയവയും ആചാരപരമായി ചെയ്തു വരുന്നു.
അവതരണം : ആചാര്യ ജി സി
