ഇന്ത്യ – ഓസ്ട്രേലിയ ഫൈനൽ; ആവേശകരമായ മത്സരത്തിൽ ദക്ഷിണാഫ്രിക്കക്ക് തോൽവി

കൊല്‍ക്കത്ത: ഏകദിന ലോകകപ്പിൽ ഇന്ത്യ – ഓസ്ട്രേലിയ ഫൈനൽ. ആവേശകരമായ മത്സരത്തിൽ ദക്ഷിണാഫ്രിക്കയെ 3 വിക്കറ്റിന് തോൽപ്പിച്ചാണ് ഓസ്‌ട്രേലിയയുടെ ഫൈനൽ പ്രവേശം. ആദ്യം ബാറ്റ് ചെയ്ത ദക്ഷിണാഫ്രിക്ക ഉയര്‍ത്തിയ 213 റണ്‍സ് വിജയലക്ഷ്യം 7 വിക്കറ്റ് നഷ്ടത്തില്‍ 16 പന്ത് ബാക്കി നിൽക്കെ ഓസീസ് മറികടന്നു. ആദ്യ ആറോവറിൽ 60 റൺസെടുത്ത് മികച്ച തുടക്കമിട്ട ട്രാവിസ് ഹെഡും ഡേവിഡ് വാര്‍ണറുമാണ് ഓസ്‌ട്രേലിയയുടെ വിജയശില്പികൾ. നവംബര്‍ 19-ന് അഹമ്മദാബാദിലെ നരേന്ദ്ര മോദി സ്‌റ്റേഡിയത്തില്‍ ലോകകപ്പിൽ അഞ്ചു തവണ മുത്തമിട്ട ഓസീസും തോൽവിയറിയാതെ ഫൈനലിലെത്തിയ ഇന്ത്യയും ഏറ്റുമുട്ടും.