നന്മ നിറഞ്ഞവൻ സന്തോഷ് കാളക്കൊടുവത്ത്

തൃപ്രയാർ: 26 വർഷമായി തുടർന്നുവരുന്ന സപര്യ ഒരാളെ സന്തോഷവാൻ ആക്കുന്നുണ്ടങ്കിൽ ആ സ്പർശം ഏൽക്കുന്ന ഏകാന്തത അനുഭവിക്കുന്നവരുടെ സന്തോഷവും നിർവൃതിയും എത്രയാണ് എന്ന് പറഞ്ഞറിയിക്കുവാൻ കഴിയുന്നതല്ല. പോളി ജംഗ്ഷനിലെ ഓട്ടോ ഡ്രൈവർ സന്തോഷ് കാളക്കൊടുവത്ത് കിടപ്പുരോഗികൾക്ക് സൗജന്യമായി മുടിവെട്ടാൻ തുടങ്ങിയിട്ട് 26 വർഷങ്ങൾ ആയിരിക്കുന്നു.

തന്റെ ചെറിയ വരുമാനത്തിൽ നിന്നും ലഭിക്കുന്ന തുക കൊണ്ട് ഓണം, വിഷു ദിനങ്ങളിൽ അനാഥരായി തെരുവിൽ അലയുന്നവർക്ക് ഭക്ഷണവും പുതുവസ്ത്രവും നൽകുന്നതും പതിവായി ചെയ്ത് വരുന്നു. സ്വന്തം ഓട്ടോ ഓടിക്കുന്നതിനിടയിൽ 25 ഓളം കിടപ്പുരോഗികളെ വീടുകളിലും ആശുപത്രികളിലും എത്തി മുടി വെട്ടി കുളിപ്പിച്ച് നൽകുന്ന സേവനവും തുടർന്ന് വരുന്നു. കൂടാതെ കിടപ്പു രോഗികൾക്ക് വായിക്കാൻ ചെറിയ ലൈബ്രറിയും ഓട്ടോറിക്ഷയിൽ സജ്ജമാക്കിയിട്ടുണ്ട്. വഴിതെറ്റി അലഞ്ഞുതിരിഞ്ഞു നടക്കുന്നവർക്ക് ആശ്രയമായി സന്തോഷ് സൗജന്യ യാത്രയും നൽകാറുണ്ട്. സന്തോഷ് കാളക്കൊടുവത്തിന്റെ നന്മ നിറഞ്ഞ പ്രവർത്തനങ്ങൾക്ക് ടീം മിഡ്‌ലൈൻ ഹൃദയാഭിവാദ്യം അർപ്പിക്കുന്നു. തുടരുക സപര്യ …