ഏകദിന ലോകകപ്പ്; ന്യൂസീലൻഡിനെതിരെ 21 റൺസിന്റെ വിജയവുമായി പാകിസ്താൻ
ബെംഗളൂരു: ഏകദിന ലോകകപ്പിൽ വെടിക്കെട്ട് ബാറ്റിങ്ങിലൂടെ പാകിസ്താന് ജയം. നിര്‍ണായക മത്സരത്തില്‍ ന്യൂസീലന്‍ഡിനെതിരെ 21 റണ്‍സിനായിരുന്നു പാകിസ്താന്റെ ജയം. മഴ കളിമുടക്കിയ മത്സരത്തില്‍ ഡക്ക്‌വര്‍ത്ത് ലൂയിസ് നിയമപ്രകാരമാണ് പാകിസ്താന്റെ ജയം. ടോസ് നഷ്ടപ്പെട്ട് ബാറ്റിംഗിനെത്തിയ ന്യൂസിലന്‍ഡ് നിശ്ചിത ഓവറില്‍ ആറ് വിക്കറ്റ് നഷ്ടത്തില്‍ 401 റണ്‍സാണ് നേടിയത്. 108 റൺസ് നേടിയ രചിന്‍ രവീന്ദ്ര, 95 റൺസ് നേടിയ കെയ്ന്‍ വില്യംസണ്‍ എന്നിവരുടെ ഇന്നിംഗ്‌സാണ് കിവീസിനെ കൂറ്റന്‍ സ്‌കോറിലേക്ക് നയിച്ചത്. മറുപടി ബാറ്റിങ്ങിൽ പാകിസ്താന് സെഞ്ചുറി നേടിയ ഓപ്പണര്‍ ഫഖര്‍ സമാന്റെ വെടിക്കെട്ട് ബാറ്റിങ്ങാണ് തുണയായത്. ഫഖര്‍ സമാൻ 81 പന്തില്‍ നിന്ന് 11 സിക്‌സും എട്ട് ഫോറുമടക്കം 126 റണ്‍സോടെ പുറത്താകാതെ നിന്നു. ബാബര്‍ 63 പന്തില്‍ നിന്ന് ആറ് ഫോറും രണ്ട് സിക്‌സുമടക്കം 66 റണ്‍സുമെടുത്തു ഉറച്ച പിന്തുണ നൽകി.
