സ്നേഹത്തണൽ ചാരിറ്റബിൾ ട്രസ്റ്റ് ജീവകാരുണ്യ പുരസ്‌കാരത്തിന് ശലഭ ജ്യോതിഷ് അർഹയായി
തൃപ്രയാർ: സ്നേഹത്തണൽ ചാരിറ്റബിൾ ട്രസ്റ്റിന്റെ ഈ വർഷത്തെ ജീവകാരുണ്യ പുരസ്‌ക്കാരത്തിന് നാട്ടിക എസ് എൻ ട്രസ്റ്റ് സ്കൂളിലെ അധ്യാപികയും എൻ എസ് എസ് കോർഡിനേറ്ററും ആയ ശലഭ ജ്യോതിഷ് അർഹയായി. സെപ്റ്റംബർ 5- ന് വലപ്പാട് റൂറൽ ബാങ്ക് ഹാളിൽ വെച്ചു നടക്കുന്ന പരിപാടിയിൽ പുരസ്‌കാരം സമ്മാനിക്കും. ടീച്ചർക്കൊപ്പം സ്കൂളിലെ എൻ എസ് എസ് അംഗങ്ങളായ വിദ്യാർത്ഥികളെ കൂടി ചടങ്ങിൽ ആദരിക്കുമെന്ന് ട്രസ്റ്റ് ഭാരവാഹികൾ അറിയിച്ചു.
വീടില്ലാതെ കഷ്ടപ്പെടുന്ന സ്കൂളിലെ കുട്ടികൾക്ക് വീടുവെച്ചു നൽകാൻ എൻ എസ് എസ് നേതൃത്വത്തിൽ ബിരിയാണി ചലഞ്ച് പോലെയുള്ള ധനസമാഹാരണവും ഒപ്പം സ്വന്തം നിലയിലും സഹായങ്ങൾ ശലഭ ജ്യോതിഷ് സമൂഹത്തിനായി നൽകിയിട്ടുണ്ട്. ശലഭ ജ്യോതിഷ് നേതൃത്വം നൽകിയ രക്‌തദാന ക്യാമ്പിന് ഏറ്റവും കൂടുതൽ ആളുകളെ പങ്കെടുപ്പിച്ച ക്യാമ്പ് എന്ന സംസ്ഥാന സർക്കാരിന്റെ മധ്യമേഖല അവാർഡ് ലഭിച്ചിട്ടുണ്ട് . സംസ്ഥാനത്ത് ഡിഫ്തീരിയ പടർന്ന സമയത്ത് ജനങ്ങൾക്ക്‌ ബോധവൽക്കരണത്തിനായി തൃശൂർ നഗരത്തിൽ ഉൾപ്പെടെ തെരുവ് നാടകങ്ങൾ നടത്തിയ ടീച്ചറെയും എൻ എസ് എസ് വിദ്യാർത്ഥികളെയും അന്നത്തെ വിദ്യാഭ്യാസ മന്ത്രി പ്രൊഫസർ രവീന്ദ്രനാഥ് ആദരിച്ചിരുന്നു.
