തൃശ്ശൂര്‍ പൂര വിളംബരം; ജില്ലാ കളക്ടറും സംഘവും 34 കി.മീ സൈക്കിള്‍ റാലി നടത്തി
ജില്ലാ ഭരണകൂടത്തിന്റെയും തൃശ്ശൂര്‍ സൈക്ലേഴ്‌സ് ക്ലബിന്റെയും നേതൃത്വത്തില്‍ തൃശ്ശൂര്‍ പൂരത്തിനു മുന്നോടിയായി പൂര വിളംബരം സൈക്കിള്‍ റാലി സംഘടിപ്പിച്ചു. ജില്ലാ കളക്ടര്‍ അര്‍ജുന്‍ പാണ്ഡ്യന്‍ ഫ്‌ലാഗ് ഓഫ് ചെയ്ത് സൈക്കിള്‍ റാലിയില്‍ പങ്കെടുത്തു. ജില്ലാ കളക്ടറും സംഘവും 50 ലേറെ സൈക്കിളുകളില്‍ ഘടക പൂരങ്ങള്‍ നടക്കുന്ന ക്ഷേത്രങ്ങള്‍ ഉള്‍പ്പെടെ 11 ക്ഷേത്രങ്ങളിലൂടെ ഏകദേശം 34 കിലോമീറ്റര്‍ സഞ്ചരിച്ചു.
രാവിലെ 5.30 ന് വടക്കുംനാഥന്‍ ക്ഷേത്രത്തിന്റെ തെക്കേഗോപുര നടയില്‍ നിന്ന് ആരംഭിച്ച സൈക്കിള്‍ റാലി തൃശ്ശൂര്‍ പൂരത്തിന്റെ പ്രധാന ക്ഷേത്രങ്ങളായ പാറമേക്കാവ്, തിരുവമ്പാടി ക്ഷേത്രങ്ങളും കണിമംഗലം ശാസ്താ ക്ഷേത്രം, പൂക്കാട്ടിക്കര കാരമുക്ക് ഭഗവതി, ലാലൂര്‍ കാര്‍ത്ത്യായനി ക്ഷേത്രം, അയ്യന്തോള്‍ കാര്‍ത്ത്യായനി ക്ഷേത്രം, ചൂരക്കോട്ടുകാവ് ഭഗവതിക്ഷേത്രം, കുറ്റൂര്‍ നെയ്തലക്കാവിലമ്മ, ചെമ്പൂക്കാവ് കാര്‍ത്ത്യായനി ക്ഷേത്രം, പനമുക്കുംപിള്ളി ശ്രീധര്‍മ്മശാസ്താ ക്ഷേത്രം തുടങ്ങി ഘടകപൂരം നടക്കുന്ന ക്ഷേത്രങ്ങളിലൂടെയും സഞ്ചരിച്ച് തിരിച്ച് രാവിലെ 8.30 ന് തെക്കേ ഗോപുരനടയില്‍ എത്തിച്ചേര്‍ന്നു.
