ആദ്യ എന്യൂമറേഷൻ ഫോം ജില്ലാ കളക്ടർ ഊര് മൂപ്പന് കൈമാറി
ഒല്ലൂർ: പ്രത്യേക തീവ്ര വോട്ടർപട്ടിക പുതുക്കലിൻ്റെ ഭാഗമായി ജില്ലയിലെ എല്ലാ ബൂത്തുകളിലും വോട്ടർമാർക്കുള്ള എന്യൂമറേഷൻ ഫോം വിതരണം ആരംഭിച്ചു. ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടർ അർജ്ജുൻ പാണ്ഡ്യൻ ഒല്ലൂർ മണ്ഡലത്തിലെ മണിയൻകിണർ ഉന്നതിയിൽ ബിഎൽഒ മാരോടൊപ്പം എത്തി എന്യൂമറേഷൻ ഫോം ഊര് മൂപ്പൻ കുട്ടൻ, മുതിർന്ന വനിതാ വോട്ടറായ തായു എന്നിവർക്ക് കൈമാറിക്കൊണ്ട് ജില്ലയിലെ വോട്ടർ പട്ടിക പുതുക്കലിൻ്റെ പ്രാരംഭഘട്ടത്തിന് തുടക്കം കുറിച്ചു.
പത്മശ്രീ ജേതാക്കളായ കലാമണ്ഡലം ഗോപി ആശാൻ, പെരുവനം കുട്ടൻ മാരാർ, സിനിമ സംവിധായകരായ സത്യൻ അന്തിക്കാട്, ലാൽ ജോസ്, ഫുഡ്ബോൾ താരങ്ങളായ രാഹുൽ രാജ്, വിക്ടർ മഞ്ഞില, എഴുത്തുകാരൻ രാധാകൃഷ്ണൻ കാക്കശ്ശേരി തുടങ്ങി കലാ-സാംസ്കാരിക-കായിക രംഗത്തെ പ്രമുഖർക്ക് എന്യൂമറേഷൻ ഫോം വിതരണം ചെയ്തു.
ബൂത്ത് ലെവൽ ഓഫീസർമാർ വോട്ടർമാരുടെ വീട്ടിൽ എത്തിയാണ് ഫോം വിതരണം നടത്തുന്നത്. വോട്ടർമാർക്ക് ഫോറം പൂരിപ്പിക്കുന്നതിനുള്ള സഹായവും ബി എൽ ഒ നൽകും. ജില്ലയിലെ പ്രമുഖ വ്യക്തികൾക്ക് ബി എൽ ഒ മാർക്കൊപ്പം ഇലക്ടറൽ രജിസ്ട്രേഷൻ ഓഫീസർമാരും കൂടി എത്തിയാണ് എന്യൂമറേഷൻ ഫോം വിതരണം ചെയ്തത്.
പൊതുജനങ്ങൾക്ക് വളരെ ലളിതമായി ബി എൽ ഒ മാരുടെ സഹായത്തോടെ ഫോം പൂർത്തിയാക്കി ബി എൽ ഒ യ്ക്ക് തിരികെ നൽകാനാകും. എന്യൂമറേഷൻ ഫോമിനൊപ്പം രേഖകളൊന്നും ഹാജരാക്കേണ്ടതില്ല. ജില്ലയിലെ ഫോം വിതരണത്തിൻ്റെ പുരോഗതി ജില്ലാ കളക്ടർ ഇലക്ടറൽ രജിസ്ട്രേഷൻ ഓഫീസർമാരുടെ യോഗത്തിൽ വിലയിരുത്തി.
ഇലക്ഷൻ ഡെപ്യൂട്ടി കളക്ടർ കെ. കൃഷ്ണകുമാർ, ഇലക്ടറൽ രജിസ്ട്രേഷൻ ഓഫീസർ എം.സി ജ്യോതി, തൃശ്ശൂർ തഹസിൽദാർ ടി. ജയശ്രീ, ബൂത്ത് ലെവൽ ഓഫീസർമാരായ പ്രമീള, ഷിബി എന്നിവർ എന്യൂമറേഷൻ ഫോം കൈമാറ്റ ചടങ്ങിൽ പങ്കെടുത്തു.
