സേലത്തെ മെഡിക്കല്‍ കോളേജ് അത്യാഹിത വിഭാഗത്തില്‍ തീപിടിത്തം; രോഗികളെ പെട്ടന്ന് മാറ്റിയതിനാല്‍ വന്‍ അപകടം ഒഴിവായി
സേലം : സര്‍ക്കാര്‍ മെഡിക്കല്‍ കോളജ് ആശുപത്രിയില്‍ തീപിടിത്തം. കുമാരമംഗലം മെഡിക്കല്‍ കോളജിലെ അത്യാഹിത വിഭാഗത്തില്‍ ബുധനാഴ്ച രാവിലെയോടെയാണ് തീപിടിത്തമുണ്ടായത്. തീയും പുകയും ശ്രദ്ധയില്‍പ്പെട്ടതിനെ തുടര്‍ന്ന് രോഗികളെ വളരെപ്പെട്ടന്ന് തന്നെ മാറ്റിയതിനാല്‍ ആളപായങ്ങള്‍ ഉണ്ടായില്ല. തീപിടിത്തം ഉണ്ടായ ഉടന്‍ തന്നെ അഗ്നിശമന സേനാംഗങ്ങള്‍ സ്ഥലത്തെത്തി. വിവിധ യൂണിറ്റുകള്‍ ഏറെ സമയം പണിപ്പെട്ടാണ് തീയണച്ചത്. രോഗികളെ തൊട്ടടുത്തുള്ള സ്വകാര്യ മെഡിക്കല്‍ കോളേജിലേക്ക് മാറ്റിയിട്ടുണ്ട്. ചികിത്സയ്‌ക്ക് തടസ്സമുണ്ടാകില്ല. സ്ഥിതിഗതികളെല്ലാം നിയന്ത്രണ വിധേയമാണെന്നും ജില്ലാ കളക്ടര്‍ അറിയിച്ചു. ഷോര്‍ട് സര്‍ക്യൂട്ടാണ് അപകടത്തിന് കാരണമെന്നാണ് പ്രാഥമിക നിഗമനം. സംഭവത്തില്‍ പോലീസ് അന്വേഷണം ആരംഭിച്ചു
