അഷ്റഫ് കാളത്തോടിൻ്റെ ‘അന്തർഭാവങ്ങൾ’ പ്രകാശനം ചെയ്തു
കുവൈറ്റ് സിറ്റി: പ്രതിഭ കുവൈറ്റ് സംഘടിപ്പിച്ച ‘കഥായനം ’25’ കഥാ ശില്പശാലയുടെ ഭാഗമായി നടന്ന നിറഞ്ഞ സദസ്സിൽ, പ്രമുഖ കവിയും എഴുത്തുകാരനുമായ അഷ്റഫ് കാളത്തോട് എഴുതിയ കവിതാ സമാഹാരം ‘അന്തർഭാവങ്ങൾ’ ഔദ്യോഗികമായി പ്രകാശനം ചെയ്തു. പ്രശസ്ത സാഹിത്യകാരൻ വി. ജെ. ജയിംസ് പുസ്തകത്തിൻ്റെ കവർ എൻജിനീയർ ജവഹറിന് നൽകി പ്രകാശനകർമ്മം നിർവഹിച്ചു.
കുവൈറ്റിലെ സാഹിത്യപ്രേമികൾക്കായി 2025 ഡിസംബർ 05 വെള്ളിയാഴ്ച ഫഹാഹീൽ കോഹിനൂർ ഓഡിറ്റോറിയത്തിൽ വെച്ചാണ് ‘കഥായനം ’25’ സംഘടിപ്പിച്ചത്. കഥയുടെ വിവിധ മാനങ്ങളെക്കുറിച്ചുള്ള ചർച്ചകളും ശില്പശാലകളും ഉൾപ്പെട്ട പരിപാടി, പുസ്തക പ്രകാശനത്തോടെ കൂടുതൽ ശ്രദ്ധേയമായി. പ്രകാശന വേളയിൽ വി. ജെ. ജയിംസ് അഷ്റഫ് കാളത്തോടിൻ്റെ കവിതകൾക്ക് ആശംസകൾ നേർന്നു. ചടങ്ങിൽ നിരവധി സാഹിത്യകാരന്മാരും പ്രതിഭ കുവൈറ്റ് പ്രവർത്തകരും പങ്കെടുത്തു.
“നമ്മളിലൊരു കഥയുണ്ട്, നമുക്കറിയാവുന്ന കഥകളുണ്ട്, നമ്മെ തേടിയെത്തുന്ന കഥകളുമുണ്ട്. അവയെ നമുക്ക് അക്ഷരങ്ങളാക്കാം, വാക്കുകളാക്കാം, വാക്യങ്ങളാക്കാം. വരൂ, നമുക്കാ വിഹായസ്സിലെ നക്ഷത്രങ്ങളാവാം,” എന്ന ഹൃദയസ്പർശിയായ വാക്കുകൾ ചടങ്ങിൽ ശ്രദ്ധേയമായി.
പുസ്തകം നല്ല രീതിയിൽ വായിക്കപ്പെടട്ടെയെന്ന് പ്രസാധകരായ നെപ്ട്യൂൺ ബുക്സ്, കൊല്ലം ആശംസിച്ചു. വായനക്കാർക്ക് പുതിയൊരു വായനാനുഭവം സമ്മാനിക്കാൻ ‘അന്തർഭാവങ്ങൾ’ എന്ന കവിതാ സമാഹാരത്തിന് കഴിയുമെന്നാണ് പ്രതീക്ഷ.
