യെമനിലേക്ക് നിർണായക മെഡിക്കൽ സഹായം നൽകി മെട്രോ മെഡിക്കൽ ഗ്രൂപ്പ്

കുവൈറ്റ്: കുവൈറ്റിലെ പ്രമുഖ ആരോഗ്യസംഘടനയായ മെട്രോ മെഡിക്കൽ ഗ്രൂപ്പ്, കുവൈറ്റ് റെഡ് ക്രസൻ്റ് സൊസൈറ്റിയുമായി (KRCS) ചേർന്ന് യെമനിലെ അധാൻ ഗവർണറേറ്റിലേക്കുള്ള നിർണായക മെഡിക്കൽ സഹായം എത്തിച്ചു. യെമനിൽ കോളറ വ്യാപനം രൂക്ഷമായ സാഹചര്യത്തിൽ ദുരിതമനുഭവിക്കുന്ന കുടുംബങ്ങൾക്ക് അടിയന്തര ചികിത്സാ പിന്തുണ നൽകുക എന്നതാണ് ഈ വലിയ ജീവകാരുണ്യ പദ്ധതിയുടെ ലക്ഷ്യം.

കുവൈറ്റ് വിദേശകാര്യ മന്ത്രാലയം, സാമൂഹ്യക്ഷേമ മന്ത്രാലയം, യെമൻ റെഡ് ക്രസൻ്റ്, സൗദി റെഡ് ക്രസൻ്റ് എന്നിവയുടെ സഹകരണത്തോടെയാണ് യെമനിലെ ഏറ്റവും ബാധിത പ്രദേശങ്ങളിലേക്ക് സഹായം എത്തിച്ചത്. ഏകദേശം രണ്ട് ലക്ഷം യുഎസ് ഡോളർ മൂല്യമുള്ള മരുന്നുകൾ, മെഡിക്കൽ ഉപകരണങ്ങൾ, ആരോഗ്യ സാമഗ്രികൾ എന്നിവ മെട്രോ മെഡിക്കൽ ഗ്രൂപ്പ് കൈമാറി.

ഒദ്യോഗിക ഫ്ലാഗ്-ഓഫ് ചടങ്ങിൽ കുവൈറ്റ് റെഡ് ക്രസൻ്റ് സൊസൈറ്റിയുടെ ജനറൽ മാനേജർ ഫവാസ് സാദ് അൽമസ്‌റോയ്, ഓപ്പറേഷൻസ് ഡയറക്ടർ സൈനബ് കംബർ, മെട്രോ മെഡിക്കൽ ഗ്രൂപ്പ് ചെയർമാനും സിഇഒയുമായ മുസ്തഫ ഹംസ, ജനറൽ മാനേജർ മുഹമ്മദ് ഷൗക്കി, കോർപ്പറേറ്റ് ബിസിനസ് മാനേജർ ഫൈസൽ ഹംസ, കോർപ്പറേറ്റ് മാർക്കറ്റിംഗ് ഹെഡ് ബഷീർ ബാത്ത എന്നിവർ പങ്കെടുത്തു.

ഈ അവസരത്തിൽ മെട്രോ മെഡിക്കൽ ഗ്രൂപ്പിൻ്റെ ചെയർമാനും സിഇഒയുമായ മുസ്തഫ ഹംസ, യെമൻ, ഗാസ എന്നിവിടങ്ങളിലേക്ക് മനുഷ്യത്വ സഹായം നൽകുന്നതിൽ കുവൈറ്റ് സർക്കാർയും ബന്ധപ്പെട്ട മന്ത്രാലയങ്ങളും കാണിക്കുന്ന സജീവ ഇടപെടലുകൾക്ക് ഹൃദയപൂർവ്വം നന്ദി അറിയിച്ചു. ഇത്തരം മഹത്തായ സർക്കാർ ഇടപെടലുകൾ രാജ്യത്തിൻ്റെ കരുണയും മനുഷ്യത്വവും ലോകത്തിനുമുന്നിൽ പ്രതിഫലിപ്പിക്കുന്നതോടൊപ്പം, സ്വകാര്യാരോഗ്യ മേഖലക്കും ജീവൻരക്ഷാ പ്രവർത്തനങ്ങൾക്കും വലിയ പ്രചോദനമാണെന്നും അദ്ദേഹം പറഞ്ഞു.

മെട്രോ മെഡിക്കൽ ഗ്രൂപ്പിൻ്റെ സംഭാവനയെ കുവൈറ്റ് റെഡ് ക്രസൻ്റ് സൊസൈറ്റിയുടെ ജനറൽ മാനേജർ ഫവാസ് സാദ് അൽമസ്‌റോയ് അഭിനന്ദിച്ചു. മനുഷ്യാവകാശ പ്രവർത്തനങ്ങളുടെ ഫലപ്രാപ്തി വർദ്ധിപ്പിക്കുന്നതിൽ സ്വകാര്യ മേഖലയുടെ പങ്കാളിത്തം നിർണായകമാണെന്നും അദ്ദേഹം പറഞ്ഞു.

ഗാസയിലേക്കും, വയനാട്ടിലെ ദുരന്തകരമായ മണ്ണിടിച്ചിലിനോടനുബന്ധിച്ചും, അത്യാവശ്യ ഘട്ടത്തിൽ ഇന്ത്യയിലേക്ക് ഓക്സിജൻ സിലിണ്ടറുകൾ അയച്ചതുമുൾപ്പെടെ, ഇതിനുമുമ്പ് നടത്തിയ സഹായപ്രവർത്തനങ്ങൾ തങ്ങളുടെ ദീർഘകാല ജീവകാരുണ്യ പ്രതിബദ്ധതയുടെ ഭാഗമാണെന്നും ഇത്തരം ജീവകാരുണ്യ പ്രവർത്തനങ്ങൾ തുടരുമെന്നും മുസ്തഫ ഹംസ വ്യക്തമാക്കി.