ഐ.ബി.പി.സി ഭാരവാഹികളുമായി നിയുക്ത സ്ഥാനപതി പരമിത തൃപതി കൂടിക്കാഴ്ച നടത്തി
കുവൈറ്റ് സിറ്റി: കുവൈറ്റിലെ നിയുക്ത ഇന്ത്യന് സ്ഥാനപതി പരമിത തൃപതിയുമായി ഇന്ത്യന് ബിസിനസ് ആന്ഡ് പ്രൊഫഷണല് കൗണ്സില് (ഐ.ബി.പി.സി) ഭാരവാഹികള് സൗഹൃദ കൂടിക്കാഴ്ച നടത്തി. ഇന്നലെ ഇന്ത്യന് എംബസിയില് നടന്ന കൂടിക്കാഴ്ചയില് ഐ.ബി.പി.സി ചെയര്മാന് കൈസര് ടി. ഷാക്കിര്, സെക്രട്ടറി സുരേഷ് കെ.പി., ജോയിൻ്റ് സെക്രട്ടറി സുനിത് അറോറ, ട്രഷറര് കൃഷന് സൂര്യകാന്ത് എന്നിവര് പങ്കെടുത്തു. നിയുക്ത സ്ഥാനപതിയുടെ കുവൈറ്റില് നടത്തിയ ആദ്യ ഔദ്യോഗിക ഇടപെടലുകളില് ഒന്നായിരുന്നു ഈ കൂടിക്കാഴ്ച. ഇന്ത്യ-കുവൈറ്റ് ബന്ധം കൂടുതല് ഉന്നതമായ നിലയിലേക്ക് നയിക്കാനുള്ള പ്രചോദനാത്മക കാഴ്ചപ്പാട് പരമിത തൃപതി ഈ അവസരത്തില് പ്രകടിപ്പിച്ചു.
കഴിഞ്ഞ 24 വര്ഷങ്ങളായി കുവൈറ്റില് പ്രവര്ത്തിച്ചുവരുന്ന ഐ.ബി.പി.സി യുടെ പ്രവര്ത്തനങ്ങളെ സ്ഥാനപതി പ്രശംസിച്ചു. ഇന്ത്യ-കുവൈറ്റ് സാമ്പത്തിക, സാംസ്കാരിക, സാമൂഹിക ബന്ധങ്ങള് കൂടുതല് ശക്തിപ്പെടുത്തുന്നതിനായി ഐ.ബി.പി.സി യുടെ തുടര്ന്നുള്ള സഹകരണം പ്രതീക്ഷിക്കുന്നതായും അവര് പറഞ്ഞു. ഇന്ത്യന് എംബസിയുമായുള്ള അചഞ്ചലമായ പിന്തുണ, സാമ്പത്തിക ഇടപെടലുകളുടെ പ്രോത്സാഹനം, സാംസ്കാരിക ബന്ധങ്ങളുടെ വളര്ച്ച, സമൂഹ ക്ഷേമ പ്രവര്ത്തനങ്ങളുടെ വികസനം എന്നിവ ലക്ഷ്യമിട്ട് വരാനിരിക്കുന്ന എല്ലാ സംരംഭങ്ങളിലും സജീവമായി സഹകരിക്കുമെന്ന് ഐ.ബി.പി.സി പ്രതിനിധികള് ഉറപ്പുനല്കി.
ഐ.ബി.പി.സി സംഘടിപ്പിക്കുന്ന 24-മത് വാര്ഷിക സമ്മേളനം ഇന്ന് കുവൈറ്റില് നടക്കും. പരിപാടി കുവൈറ്റ് വാണിജ്യകാര്യ മന്ത്രി ഖലീഫ അബ്ദുല്ല അല് അജീല് ഉദ്ഘാടനം നിര്വഹിക്കും. എച്ച്സിഎല് ടെക്കിൻ്റെ ചെയര്പേഴ്സണ് റോഷ്നി നാടാര് മല്ഹോത്ര മുഖ്യപ്രഭാഷകയായിരിക്കും. നിയുക്ത സ്ഥാനപതി പരമിത തൃപതി സമ്മേളനത്തില് മുഖ്യാതിഥിയായി പങ്കെടുത്ത് അഭിസംബോധന നടത്തും. കൂടിക്കാഴ്ചയില് ഡെപ്യൂട്ടി ചീഫ് ഓഫ് മിഷന് സഞ്ജയ് കെ. മല്ലുക, ഉദ്യോഗസ്ഥരായ ദേവേന്ദ്ര പുഞ്ച്, ഹരിത് കേതന് ഷാലത്ത് തുടങ്ങിയവരും സംബന്ധിച്ചു.
